Khamoshi Ke Alfaaz Ko Sun

Khamoshi Ke Alfaaz Ko Sun,
Ek Prem-Geet Hai teri Khaatir..

Jo Raag Basa Hai Dhadkano Mein,
Bas Usko Sun!
E sanam Kaafir!

Mein Haal-E-dil To Bayaa Kar Du,
Ek Baat Mujhe Par Khalti Hai..
Ayaat-E-ishq Aankho Se Padhlo,
Ye Jabaan To Jahaan Ko Chhalti Hai..

Duniya Ke Shor-Sharabe mein,
meri Preet Ki Dhun Ko E Jaana!
Mein Janta Hu Mushqil Hai Bahut,
Khaamosh Taraano Ko Sun Pana..!

Ek Chondhwi Raat Ke Dhalte Pahar,
Kisi Thahri Nadi Ki Puliya Par!
Hum Baithe Rahein Aasmaa Tale,
Dil Mein Khwabo Ki Shamaa Jale!

Tu Meri Aankh Mein Padh Lena,
Jo Baat Jubaan Par Aati Nahi..
Kahte Na Bane, Sahte Na Bane,
Ab Mujhse Raha Bhi Jata Nahi!

Iqaraar Pe Tere Sadke Hai,
Ye Jaan Meri Hai Tere Haazir!
Khamoshi Ke Alfaaz Ko Sun,
Ek Prem-Geet Hai Teri Khaatir..